TFF yasalimu amri ya serikali

HATIMAYE Shirikisho la Soka Tanzania (TFF), limelazimika kukubaliana na maagizo ya Serikali ya Jamhuri wa Muungano wa Tanzania kupitia Wizara ya Habari, Vijana, Utamaduni na Michezo juu ya sakata la katiba ya shirikisho hilo. Awali, serikali kupitia kwa waziri wa wizara hiyo, Dk. Fenella Mukangara, iliiagiza TFF kutumia katiba ya mwaka 2006, badala ya ile ya 2012 ambayo inadaiwa kuwa na kasoro nyingi lakini shirikisho hilo likagoma. Katika kikao kilichofanyika jana jijini Dar es Salaam kati ya serikali na TFF kikiwa ni cha pili baada ya kile cha awali kuisha bila makubaliano, inaelezwa kuwa shirikisho hilo lilinyoosha mkono na kukubali maagizo ya serikali. “Kikao kilikuwa kizito kwa kweli, rais (Leodegar Tenga) alizungumza mengi juu ya kile wanachokiona kama TFF juu ya maagizo waliyopewa na serikali na waziri akawasikiliza lakini ilibidi mwisho msimamo wa serikali ubaki vilevile kama ilivyokuwa awali na sasa itatubidi tufuate, hakuna jinsi,” kilisema chanzo cha kuaminika kutoka TFF ambacho kilihudhuria kikao hicho. Katibu Mkuu wa TFF, Angetile Osiah, amekiri kufanyika kwa kikao hicho ingawa aligoma katakata kuzungumzia juu ya kile kilichojiri huku akiahidi kila kitu kitazungumzwa leo. “Kikao kimefanyika lakini siwezi kuzungumzia lolote kwa sasa mpaka hapo kesho (leo) mtakapopewa taarifa kamili,” alisema Osiah.
source: Global Publishers