HOTUBA YA MSEMAJI MKUU WA KAMBI RASMI YA UPINZANI BUNGENI KATIKA WIZARA YA AFRIKA MASHARIKI MHE. JOSEPH ROMAN SELASINI (MB), AKIWASILISHA BUNGENI MAONI YA KAMBI YA UPINZANI KUHUSU BAJETI YA WIZARA YA AFRIKA MASHARIKI KWA MWAKA WA FEDHA 2015/2016
Inatolewa kwa mujibu wa Kanuni
ya 99(9) ya Kanuni za Kudumu za Bunge Toleo la Mwaka 2013
____________________________
1. UTANGULIZI
Mheshimiwa
Spika, napenda kuchukua
nafasi hii, kwanza, kumshukuru Mwenyezi Mungu kwa kunijalia afya njema na
kuniepusha na dhoruba mbalimbali katika shughuli zangu za kibunge na kijamii.
Pili napenda kuchukua nafasi hii kueleza masikitiko yangu kutokana na matusi,
kashfa na kejeli zinazotolewa kwa wananchi wa jimbo langu kwenye vyombo vya
habari, mitandao ya kijamii na mbaya zaidi hata ndani ya Bunge hili tukufu.
Mheshimiwa
Spika, dharau na kejeli
hizi zilitokana na kauli ya Mkuu wa Wilaya ya Rombo Lembris Kipuyo na
Mwenyekiti wa Halmashauri ya Rombo Anthony Tesha kwamba wanaume katika Jimbo
langu hawana nguvu za kiume kutokana na ulevi uliokithiri na hivyo kuwafanya
akina mama wa Rombo kukodisha wanaume kutoka nchi jirani ya Kenya kwa ajili ya
kuwapatia huduma hiyo. Kauli hii iliyotokana na baadhi ya wananchi kuhojiwa na
kutoa maoni yao kuhusu hali ya ulevi jimboni; imechukuliwa visivyo kwa
kuwajumuisha wananchi wote.
Mheshimiwa
Spika, vita dhidi ya ulevi
uliokithiri na matumizi ya pombe zisizo na viwango ilianzishwa na Mhashamu Baba
Askofu Isaack Amani wa Jimbo Katoliki la Moshi mwaka 2010 alipoandika waraka
maalum kwa parokia zote Jimboni Moshi Rombo ikiwemo kuwakemea na kuwakataza
waumini na wananchi wote kutojihusisha na ulevi uliokithiri wa pombe zisizo na
viwango. Na kwa kipindi chote hicho mimi kama
Mbunge wa Jimbo la Rombo nimekuwa nikiunga mkono na nitaendelea kuunga mkono
jitihada hizo za Baba Askofu, Mapadre, Wachungaji na Mashehe katika vita hiyo.
Mheshimiwa
Spika, hata hivyo,
Serikali ya Wilaya ya Rombo, ikiongozwa na Mkuu wa Wilaya, ambaye ni Mwenyekiti
wa Kamati ya Ulinzi na Usalama haikuwahi kuchukua hatua yoyote madhubuti
kushirikiana na viongozi wa dini katika vita hiyo zaidi ya udhalilishaji
tuliousikia katika wiki hii ndani ya Baraza la Madiwani wa Halmashauri ya Rombo
inayoongozwa na CCM kwamba wanaume hawana nguvu za kiume na wanawake
wanakodisha wanaume nchi jirani ya Kenya.
Mheshimiwa
Spika, Serikali ndiyo
inayotekeleza sheria ya vileo, biashara na uhamiaji na vyombo mbalimbali vya
udhibiti wa ubora kama TBS na TFDA na viko chini yake. Serikali inashindwa vipi
kutekeleza sheria hizo au kutumia vyombo vyake na badala yake inawatukana na
kuwadhalilisha wananchi. Napenda kumalizia utangulizi wangu kwa kulaani
udhalilishaji huu na kwamba wananchi wachache waliohojiwa na vyombo vya habari katika
Kijiji kimoja na kitongoji kimoja cha Kikelelwa alikozaliwa na anakoishi Mwenyekiti
wa Halmashauri ya Rombo na ambako ndiko Mkuu wa Mkoa na Mkuu wa Wilaya
walikotembelea hakiwezi kuchukuliwa kama kielelezo cha taswira ya udhaifu kwa Wilaya nzima ya Rombo yenye kata 28, vijiji 68
na vitongoji 311.
Mheshimiwa
Spika, nitaendelea kuunga
mkono jitihada za Baba Askofu Isaack Amani na Kanisa kuwashauri waumini na
wananchi kwa ujumla kunywa pombe zilizothibitishwa ubora wake, kunywa kwa
kiasi, kunywa kwa wakati unaokubalika kisheria na au kutafuta vinywaji
vingine badala ya vileo.
Mheshimiwa
Spika baada ya kusema
hayo napenda pia kuchukua nafasi hii kuupongeza UKAWA chini ya uongozi shupavu
wa Mhe. Freeman Aikaeli Mbowe (Mb) ambaye pia ni Kiongozi wa Upinzani Bungeni,
kwa kazi kubwa ya kuwahamasisha wananchi kujiandikisha katika Daftari la Wapiga
Kura ili wawe na sifa ya kupiga kura katika Uchaguzi Mkuu wa Oktoba, 2015. Ni
matumaini na matarajio ya wananchi kwamba Upinzani unakwenda kushinda katika
uchaguzi huo na kuunda Serikali na hivyo kubadili maisha ya watanzania ambao
wamedanganywa na kufanywa maskini tangu tupate uhuru miaka 53 iliyopita.
Mheshimiwa
Spika, napenda pia kutumia
nafasi hii, kwa niaba ya Kambi Rasmi ya Upinzani Bungeni kutoa pole kwa
majirani zetu wa Kenya kwa tukio la uvamizi wa kigaidi
katika Chuo Kikuu cha Garissa tarehe 2 Aprili, 2015 ambapo wanafunzi 147 walipoteza maisha na
wengine 79 kujeruhiwa vibaya.
Mheshimiwa
Spika, Kambi Rasmi ya
Upinzani Bungeni inalaani mauaji ya Kiongozi wa chama cha Upinzani
cha Union for Peace and Development (UPD)
nchini Burundi,
Zedi Feruz. Kiongozi huyu aliuwawa kwa kupigwa risasi yeye na mlinzi wake na
watu wasiojulikana nyumbani kwake mjini Bujumbura
Mheshimiwa Spika,
sote tunatambua kwamba kuna machafuko ya kisiasa nchini Burundi, na machafuko hayo yanatuathiri pia sisi
watanzania kwa kuwa wakimbizi kutoka Burundi zaidi ya 70, 000 wapo nchini kwetu. Burundi
ni nchi tuliyopakana nayo na ni nchi
mwanachama wa Jumuiya ya Afrika Mashariki, na Rais wa Tanzania kwa sasa ni Mwenyekiti wa Jumuiya ya
Afrika Mashariki. Kambi Rasmi ya Upinzani inataka kujua ni jitihada gani Tanzania inafanya kama Jirani wa nchi ya Burundi lakini pia kama Mwenyekiti wa
Jumuiya ya Afrika Mashariki ili kuleta
utulivu na amani Burundi? Na ni namna
gani Tanzania inasaidiwa na nchi za Jumuiya ya Africa Mashariki kubeba mzigo wa
wakimbizi walioingia nchini.
2. ULINZI
NA USALAMA KATIKA JUMUIYA
Mheshimiwa Spika
katika hotuba yangu kuhusu bajeti ya Wizara hii kwa mwaka wa fedha 2014/15
nilieleza jinsi Jumuiya Afrika Mashariki inavyokabiliwa na tishio kubwa la ugaidi. Ukiacha matukio makubwa ya kigaidi
ya Garissa na West Gate, kumekuwa na matukio mengi madogomadogo ya kigaidi nchi
Kenya na Uganda.
Mheshimiwa Spika Kambi
Rasmi ya Upinzani Bungeni inatambua umuhimu wa kuimarisha Ulinzi na Usalama
ndani ya Jumuiya kwa sababu inatambua kwamba hata Tanzania haipo salama kutokana na
kuzungukwa na majirani ambao ni wahanga wa matukio ya kigaidi.
Mheshimiwa Spika, kutokana
na kuongezeka kwa vitendo vya
kigaidi na kiharamia duniani na kuongezeka kwa
aina mbalimbali za uhalifu mataifa mbalimbali duniani yamebuni mbinu
mbalimbali za kiulinzi ikiwa ni pamoja na kuanzisha mashirikiano baina ya nchi
na nchi kuhusu namna ya kujilinda na kujihami dhidi uvamizi au uhalifu unaoweza
kujitokeza katika nchi moja au ukanda ambao uko katika ushirikano.
Mheshimiwa Spika,
kwa muktadha huo, Kambi Rasmi ya Upinzani Bungeni iliunga mkono Azimio la Bunge
la Kuridhia Itifaki ya Jumuiya ya Afrika Mashariki juu ya Ushirikiano katika
Masuala ya Kiulinzi (The East Africa Protocol on Cooperation in Diffence Affairs) lililopitishwa
na Bunge tarehe 21 Novemba, 2014.
Mheshimiwa Spika,
pamoja na kuunga mkono azimio hilo,
Kambi Rasmi ya Upinzani ilitoa ushauri ufuatao:
i.
Kutotumia
kivuli cha iitifaki hiyo kuitetea au kuilinda Serikali yoyote ya nchi
zilizoridhia itifaki hiyo ambayo itakataliwa na wananchi wake. Kambi Rasmi ya
Upinzani ilisisitiza kwamba Azimio hilo lisiwe kinga kwa Serikali ambazo zitakuwa
zimekataliwa na wananchi wake.
ii.
Nchi
zilizoridhia itifaki hiyo zisishiriki katika ukandamizaji wa wa raia wa nchi
zao au nchi nyingine halafu zikategemea kupata ushirikiano wa kiulinzi kutokana
na itifaki hiyo.
iii.
Utatuzi
wa migogoro utumie njia ya mazungumzo ya kidiplomasia zaidi kuliko kutumia nguvu za kijeshi ili
itifaki hiyo ifikie malengo yaliyokusudiwa na iwe na manufaa ya kuduma katika
nchi zilizoiridhia.
iv.
Kupitia
mara kwa mara taarifa za makubaliano ya Azimio hilo
na utekelezaji wake ili kuhakikisha hakuna mabadiliko hasi ya Azimio hilo kulingana na wakati.
Mheshimiwa Spika,
Kambi Rasmi ya Upinzani inaitaka Serikali kulieleza Bunge hili imetekeleza vipi
Itifaki ya Jumuiya ya Afrika Mashariki juu ya Ushirikiano katika Masuala ya
Kiulinzi katika kuisaidia nchi ya Kenya ambayo imekumbwa na madhila ya
mashambulizi ya kigaidi?
Mheshimiwa Spika, machafuko
yanayoendelea nchini Burundi
hivi sasa yanaashiria kuwa Serikali ya Burundi
haiungwi mkono na wananchi wa Burundi.
Zipo taarifa kwamba wakati wa jaribio la Mapinduzi nchini humo Rais wa Nchi
hiyo Pierre Nkurunzinza alikuwa Tanzania,
na baada ya jaribio la Mapinduzi kushindwa, Serikali ya Tanzania ilimsaidia kurudi Burundi. Kambi Rasmi ya Upinzani
inataka kujua kama ni mpango au sera ya Serikali ya Tanzania kuzisaidia Serikali zinazokataliwa
na wananchi wake kuendelea kubaki madarakani kimabavu.
3. BUNGE LA AFRIKA MASHARIKI
(EALA) NA MCHAKATO WA UCHAGUZI WA WABUNGE WA AFRIKA MASHARIKI
Mheshimiwa Spika, Kambi
Rasmi ya Upinzani Bungeni imekuwa ikiulalamikia mchakato wa kibaguzi wa
uchaguzi wa wabunge wa Afrika Mashariki uliofanywa na Bunge letu tarehe 17
Aprili, 2012.
Mheshimiwa Spika,
msingi wa malalamiko hayo ulitokana na ukiukwaji wa Kifungu cha 50(1) cha
Mkataba wa Jumuiya ya Afrika Mashariki
kinachotoa mwongozo wa namna ya kuwapata wawakilishi katika Bunge la Afrika
Mashariki. Bunge la Tanzania, ama kwa makusudi au kwa
kutoelewa matakwa ya Mkataba wa Jumuiya, liliweka mfumo wa kibaguzi katika uchaguzi wa wabunge wa EALA katika bunge letu
ambao hautoi fursa kwa vyama vya upinzani kupata uwakilishi.
Mheshimiwa Spika,
Kutokana na hali hiyo, aliyekuwa mgombea wa nafasi ya Ubunge wa Afrika
Mashariki kutoka Chama cha Demokrasia na
Maendeleo Ndugu Anthony Calist Komu, alifungua kesi katika Mahakama ya Afrika
Mashariki dhidi ya Mwanasheria Mkuu wa Serikali kuhusu ukiukwaji wa Mkataba wa
Afrika Mashariki katika kuwachagua wabunge wa Afrika Mashariki.
Mheshimiwa Spika, Kwa
mujibu wa hukumu iliyotolewa na Mahakama ya Afrika Mashariki ya tarehe 26
Septemba 2014, Ndugu Anthony Komu ameshinda kesi hiyo jambo linalothibitisha
kwamba haki haikutendeka, lakini baya zaidi ni kielelezo kwamba hatufahamu
vipengele vya mkataba wa Jumuiya ya Afrika Mashariki ambapo sisi ni wanachama
wa Jumuiya hiyo.
Mheshimiwa Spika,
sehemu ya hukumu hiyo inasomeka kama ifuatavyo, nanukuu
For
all the above reasons, the final orders in this Reference are that:
(a)
Prayer (ii) is dismissed
(b)
Prayer (i) is granted in the
following terms only:
“A declaration is here by issued that to the
extent that the election for Members of Parliament of East African Legislative
Assembly conducted by the National Assembly of Tanzania on 17 April, 2012 was
premised on only Political Parties as the sole grouping as opposed to all other
groups envisaged in Article 50(1) of the Treaty, then the National Assembly of
Tanzania violated the said Article”.
(c)
Prayer (iii) is granted in the
following terms only:
“A
declaration that, by allowing a political party without representation in the
National Assembly (TADEA) to field a candidate in the election of 17 April,
2012 for representative to EALA, then the National Assembly of Tanzania was in
violation of Article 50(1) of the treaty”.
It
is so ordered.
Mheshimiwa Spika, Kwa
kuwa Serikali hii ya awamu ya nne inamaliza muda wake, Serikali mpya ya UKAWA
itafanya mapitio ya Kanuni za Bunge ili kuhakikisha kwamba zinaendana na
mikataba na itifaki mbalimbali za Afrika Mashariki tulizoridhia ili kujenga
mazingira ya uwazi na haki Bunge linapotekeleza majukumu yake kuhusiana na
mikataba au itifaki hizo.
4. KASI NDOGO YA TANZANIA
KUCHANGAMKIA FURSA KIUCHUMI KATIKA
JUMUIYA YA AFRIKA MASHARIKI
Mheshimiwa Spika, Nchi
yetu ina fursa za wazi kabisa za kufaidika na Jumuiya ya Afrika ya Mashariki.
Cha kusikitisha ni kwamba, serikali hii ya CCM badala ya kuwa na mpango kabambe
wa kufaidi fursa hizi imekuwa ni kikwazo kikubwa katika kukua na kusonga mbele
katika Jumuiya hii. Kuna lawama za kila aina kuwa serikali ya Tanzania ni kikwazo katika
utekelezaji wa Mkataba wa Afrika Mashariki.
Mheshimiwa Spika, Ikumbukwe
kuwa nchi yetu inapakana na nchi nane katika mipaka yake. Kushindwa kutumia
fursa za kiuchumi ambazo tunazo ni kikwazo kikubwa cha maendeleo ya wananchi
wetu. Kwa sasa tunanunua kwa wingi kuliko tunavyouza. Ni katika hali hii thamani
ya shilingi yetu inazidi kuporomoka.
Tungetumia fursa za kiuchumi kwa nchi nane tu tulizopakana nazo, hakika Tanzania
ingesonga mbele kiuchumi.
Mheshimiwa Spika, Serikali
hii imeshindwa kufukuzia fursa za kiuchumi katika Jumuiya ya Afrika Mashariki
kiasi kwamba hata wale wananchi waliopo mipakani kama wananchi wangu wa Rombo
hawaelewi hii Jumuiya inawasaidiaje kujikwamua kiuchumi.
5. MFUMO WETU WA ELIMU NA FURSA ZA
AJIRA NDANI YA JUMUIYA YA AFRIKA MASHARIKI
Mheshimiwa Spika, Katika
hotuba zetu za Kambi Rasmi ya Upinzani katika Wizara ya Elimu tumekuwa tukitoa
mapungufu makubwa katika mfumo wetu wa elimu ambao umepelekea kuathiri hata
fursa za ajira za wahitimu wetu nchini.
Mheshimiwa Spika, Katika
miaka ya hivi karibuni kumekuwa na malalamiko kutoka kwa wananchi na wanasiasa
kuwa utekelezaji wa soko la pamoja la Afrika Mashariki utaathiri fursa za ajira
za watanzania hapa nchini, kwa hofu kuwa ajira nyingi zitaenda kwa jirani zetu
wa Kenya au Uganda.
Mheshimiwa Spika, Hofu
hii ya wananchi na wanasiasa ni dhahiri inatokana na mfumo mbovu wa elimu ambao
umechangiwa na serikali hii ya CCM. Kutokana na hali hiyo; viongozi na baadhi ya wananchi wenye uwezo
wanawapeleka watoto wao nchi za nje hasa
nchi jirani ya Kenya kwa ajili ya kupata elimu bora. Ni rai ya Kambi Rasmi ya Upinzani Bungeni kwa
Serikali kuupitia upya mfumo wa Elimu yetu ili ushabihiane na nchi washirika
ili kuwe na ushindani wenye mizania sawa ya kigezo cha elimu katika kuwania
fursa za ajira katika Jumuiya ya Afrika Mashariki.
Mheshimiwa Spika, Kambi
Rasmi ya Upinzani inawaahidi wananchi kuwa itaufumua upya mfumo wa elimu yetu
ili kuendana na hali halisi ya soko la ajira katika Afrika Mashariki baada ya
kuipumzisha CCM katika Uchaguzi wa Oktoba Mwaka huu 2015.
6. MAFUNZO KWA MAJAJI WA MAHAKAMA
YA AFRIKA MASHARIKI
Mheshimiwa Spika, Katika
hotuba yetu kwa mwaka wa fedha 2014/2015 tulieleza kwa kina namna mchakato mzima wa uteuzi wa Majaji wa Afrika Mashariki
unavyofanyika na namna ambavyo Majaji wanavyochukua muda mrefu katika mafunzo
kuliko kuhudumia mahakama na aukufanya
kazi zao.
Mheshimiwa Spika, Jambo
hili linatokana na Majaji kutoka katika mifumo tofauti ya kisheria katika nchi
zetu. Tuliitaka Serikali hii ya CCM kupeleka hoja ya kuongeza muda wa Majaji
ili kuwapa muda wa mafunzo lakini pia kuwapatia muda wa kuhudumia katika
Mahakama hiyo, lakini mpaka sasa hakuna liliofanyika.
Mheshimiwa Spika, Serikali
itakayoundwa na Kambi Rasmi ya Upinzani Bungeni itahakikisha kuwa inapeleka
hoja ndani ya Jumuiya kuboresha utaratibu wa uteuzi wa Majaji na mfumo mzima wa
Mahakama hiyo kwa manufaa ya nchi washirika na wananchi wetu.
7. FAIDA NA HASARA ZA UANACHAMA
PACHA KATIKA MASHIRIKIANO YA KIKANDA
Mheshimiwa Spika, katika
hotuba yangu kuhusu bajeti ya Wizara hii kwa mwaka wa fedha 2014/15, niliitaka
Serikali kuainisha uwiano wa fursa na faida za kiuchumi Tanzania inazopata katika Jumuiya
ya Afrika Mashariki na SADC ili hatimaye tuweze kuchagua ushirika mmoja wenye
tija kwetu zaidi kuliko kuwa katika sehemu zote mbili bila ufanisi.
Mheshimiwa Spika,
ni katika muktadha huo niliwakumbusha Waheshimiwa Wabunge methali moja isemayo “Mshika Mawili Moja Humponyoka”
nikimaanisha hatuwezi kuwa “effective” katika
mashirikiano yote mawili kwa asilimia mia moja. Lazima katika ushirika mmoja
tutalegalega. Kambi Rasmi ya Upinzani inaitaka Serikali kulieleza Bunge hili ni
nini mantiki ya kung’ng’ania kuwa katika mashirikiano yote mawili. Aidha, Kambi
Rasmi ya Upinzani inataka kujua kama msingi wa mashirikiano hayo umezingatia
ukuzaji wa diplomasia ya uchumi au Serikali imeendelea kung’ang’ania diplomasia
ya kisiasa ili kusaidiwa kuendelea kubaki madarakani na nchi washirika kwa kuruhusu “free movements” ambapo
imebainika kwamba raia wa kigeni wanaingia nchini bila viza na wanaandikishwa kama wapiga kura hapa nchini.
Tunaitaka Serikali kutoa kauli kuhusu jambo hili.
Mheshimiwa Spika, Kambi
Rasmi ya Upinzani Bungeni iliishauri Serikali kufanya utafiti ili kuona ni
katika umoja upi ambapo Taifa litanufaika zaidi kiuchumi ili kubaki katika
umoja huo na kujiondoa kwenye umoja uliobaki. Kambi Rasmi ya Upinzani Bungeni
ilirejea Ripoti ya Uchumi ya Benki ya Dunia ya mwaka 2012 kuhusu mwenendo wa
kibiashara katika Nchi za Afrika Mashariki. Katika Ripoti hiyo ilibainika
kwamba mwenendo wa kibiashara wa
Tanzania (kwa maana ya kuuza na kununua bidhaa); katika nchi kumi ambazo tunanunua bidhaa
duniani, Kenya ni nchi ya 8; na katika
nchi kumi za ambazo tunauza bidhaa katika bara la Afrika, Kenya ni nchi ya pili.
Ilibainika
pia kwamba maingiliano ya kibiashara ya wananchi wa Tanzania katika nchi za Jumuiya ya
Afrika Mashariki ni makubwa zaidi kuliko maingiliano na nchi za SADC. Hili
linatokana na takwimu ndani ya Jumuiya ya Afrika Mashariki ambazo zinaonesha
kuwa Tanzania inafanya
biashara zaidi na nchi za Kenya
na Uganda.
Mheshimiwa Spika,
kwa maelezo hayo, ni dhahiri upande wenye faida zaidi kiuchumi unajulikana nao
ni Jumuiya ya Afrika Mashariki. Kambi Rasmi ya Upinzani inaitaka Serikali
kueleza faida za kiuchumi katika SADC ikiwa watanzania wanawindwa kama swala huko Afrika ya Kusini kutokana na ubaguzi
katika ajira?
8. WAHAMIAJI HARAMU KUTOKA KWA
NCHI WASHIRIKA
Mheshimiwa Spika,
Kambi Rasmi ya Upinzani inataka kujua Serikali itaweza vipi kudhibiti uhamiaji
haramu hapa nchini ikiwa imefungua mipaka na kuondoa masharti ya viza kwa
baadhi ya nchi inazopakana nazo. Aidha, Kambi Rasmi ya Upinzani inataka kujua
ni kwa nini masharti ya viza yaondolewe kwa
Msumbiji na sio katika nchi nyingine za Jumuiya ya Afrika Mashariki? Kuna
ajenda gani ya siri na Msumbiji?
9. MAFURIKO YA WAKIMBIZI KUTOKA BURUNDI
Mheshimiwa Spika, machafuko
ya kisiasa yanayoendelea nchini Burundi yamesababisha mafuriko ya wakimbizi wa
Burundi nchini kwetu. Kwa mujibu wa shirika la Kimataifa la Oxfam, zaidi ya
wakimbizi 70,000 wameshaingia Tanzania
kutokana na machafuko yanayoendelea nchini Burundi.
Mheshimiwa Spika,
Kambi Rasmi ya Upinzani Bungeni inaitaka Serikali kueleza ina mikakati gani ya
kukabiliana na athari za wimbi la
wakimbizi wanaoingia nchini kama vile mahitaji ya chakula, maji safi, huduma za
afya ukizingatia kuna magonjwa ya mlipuko ya kuhara na kipindupindu ambayo yamewapata wakimbizi na
wananchi wetu pia.
10.
MAPITIO
YA UTEKELEZAJI WA BAJETI YA WIZARA KWA
MWAKA 2014/15 NA UCHAMBUZI WA BAJETI YA
2015/16
Mheshimiwa Spika, wizara hii
ilitengewa shilingi bilioni 23.06 katika mwaka wa fedha 2014/15 lakini hadi kufikia Machi, 2015 fedha iliyotolewa
na hazina ilikuwa ni shilingi bilioni 14.35 sawa na asilimia 62.2 tu ya bajeti
iliyoidhininshwa. Kambi Rasmi ya Upinzani inataka Serikali kulithibitishia
bunge hili kama itaweza kutekeleza asilimia 37.8 iliyobaki kabla ya mwaka huu
wa fedha kumalizika.
Mheshimiwa Spika,
kwa mujibu wa randama ya wizara fungu 97 (uk.13) katika shilingi bilioni 14.35
iliyotolewa na hazina kufikia machi, 2015, ni shilingi bilioni 3.09 tu
iliyotumika kutekeleza majukumu ya wizara huku kiasi cha shilingi bilioni 9.85
kikitumika kama mchango wa Tanzania katika Jumuiya ya Afrika Mashariki.
Mheshimiwa Spika,
kwa mwaka mpya wa fedha 2015/16 Wizara hii inaomba kuidhinishiwa kiasi cha
shilingi bilioni 24.59.
Fedha
za matumizi mengineyo ni shilingi bilioni 21.9, Kati ya fedha hizo, shilingi
bilioni 14.45 sawa na asilimia 66 ni kwa
ajili ya michango wa Tanzania katika
Jumuiya ya Afrika Mashariki na shilingi bilioni 7.52 sawa na asilimia 34
ya matumizi mengineyo ni kwa ajili ya kutekeleza majukumu ya wizara kwa mwaka
wa fedha 2015/16.
Mheshimiwa Spika,
kiuhalisia bajeti ya wizara hii ni ndogo sana, na kwa uzoefu fedha hazitolewi kwa wakati.
Pengine hii ni sababu mojawapo ya Tanzania kulaumiwa na nchi wanachama wa
Jumuiya kwamba iko nyuma katika kutekeleza baadhi ya programu na miradi ya
maendeleo ya Jumuiya ya Afrika Mashariki.
11.
HITIMISHO
Mheshimiwa Spika,
napenda kumalizia hotuba yangu kwa kuwatakia maisha mema uraiani baada ya Bunge
kuvunjwa, napenda pia kuwatakia kila la heri na ushindi wa kishido wabunge na
watia nia wote wa UKAWA katika Uchaguzi Mkuu wa Oktoba mwaka huu wa 2015.
Mheshimiwa Spika, napenda
pia kuwapa wosia wana CCM kuanza kujiandaa kisaikolojia kupokea mabadiliko
kwani ifikapo Oktoba, Taifa litaandika historia mpya kwa UKAWA kuingia
madarakani.
Mheshimiwa Spika,
baada ya kusema hayo, naomba kuwasilisha.
Joseph Roman
Selasini (Mb)
MSEMAJI
MKUU WA KABI RASMI YA UPINZANI NA
WAZIRI
KIVULI WA USHIRIKIANO WA AFRIKA MASHARIKI
29 Mei, 2015
BUKOBAWADAU
Bukoba Wadau ni mtandao unao toa habari na matukio yanayo tokea katika mji wa bukoba pamoja na mkoa wa kagera kwa ujumla.
Email:bukobawadau@gmail.com | Phone :Mc baraka:0784 505045, 0754 505043
Instagram @bukobawadau | Facebook @bukobawadau
